Digər Xəbərlər
Anar Rzayev: "Nazir mənə töhmət versəydi, bundan xəbərim olardı"
“Nazir mənə töhmət versəydi, bundan xəbərim olardı. TIR sürücülərinin bugünkü etiraz aksiyasında adı hallanan əməkdaşımız isə 7-8 gündür ki, məzuniyyətdədir”.
RePost.Az report-a istinadən xəbər verir ki, bunu Rəqəmsal İnkişaf və Nəqliyyat Nazirliyi yanında Dövlət Avtomobil Nəqliyyatı Xidmətinin (DANX) rəisi Anar Rzayev töhmət alması, qurumun şöbə müdiri Malik Əliyevin işdən çıxarılması ilə bağlı deyilənlərə münasibət bildirərkən deyib.
"Həmin şöbə müdiri ötən ayın əvvəlində əməliyyat keçirmişdi. İlin əvvəlində iş çox olduğu üçün biz ondan xahiş etdik ki, işə çıxsın. Gərginlik azalandan sonra o, məzuniyyətini davam etdirir”, - deyə DANX-ın rəisi qeyd edib.
Xatırladaq ki, bu gün səhər saatlarında 4 TIR sürücüsü DANX-a etiraz olaraq Bakının Heydər Əliyev prospektini bağlayıb. Onlar buna səbəb kimi icazə vərəqələrinin verilməməsini bildirib, A.Rzayev və M.Əliyevi ittiham ediblər. Mətbuatda A.Rzayevə töhmət verilməsi, M.Əliyevin vəzifəsindən azad edilməsi barədə xəbər yayılıb.
Baxış sayı: 3124 | Tarix: 17.02.2022
Bizi Telegramda izləyin: @repostaz
