“Keşlə”nin prezidenti Zaur Axundov futbolçuları Nizami Hacıyev və Mirhüseyn Seyidovun həbsinə münasibət bildirib. “Qafqazinfo”ya açıqlama verən klub rəsmisi məlumatı təsdiq edib.
 
O bildirib ki, hüquq-mühafizə orqanları araşdırmaları davam etdirir və rəsmi məlumat yayacaqlar: “Biz dəfələrlə oyun alqı-satqısının qarşısını almaq üçün seminarlar keçirmişik. Dəfələrlə demişik ki, belə şeylər olmamalıdır. Bu seminarlarda hüquq-mühafizə orqanlarının əməkdaşları da iştirak ediblər. Yəqin ki, indi onlarda hansısa məlumat var ki, Nizami və Mirhüseyni həbs ediblər. Biz də polisdən cavab gözləyirik”.
 
Axundov klub tərəfindən hüquq-mühafizə orqanlarına heç bir müraciət olunmadığını bildirib: “Yox, biz heç kimə bu barədə nəsə deməmişik. Sadəcə onlar özləri araşdırırlar. Hələlik yalnız 2 futbolçunu həbs ediblər. Hər şey ola bilər. Qoy bu hamıya dərs olsun”.
 
“Neftçi”nin baş məşqçisi Tərlan Əhmədov isə hadisədən xəbərsiz olduğunu deyib.
 
“Nizami Hacıyevlə Mirhüseyn Seyidovun saxlanılması barədə məlumatım yoxdur. İlk dəfə sizdən eşidirəm”.
 
 
Premyer Liqanın XIII turu çərçivəsində baş tutan “Neftçi” – “Keşlə” (3:1) oyununda qonaqların 2 futbolçusu – Nizami Hacıyev və Mirhüseyn Seyidov bilərəkdən zəif çıxış etməkdə ittiham olunurlar. “Keşlə”dən uzaqlaşdırılan həmin futbolçuların oyunu satdıqları üçün dünən axşam saatlarında müvafiq orqanlar tərəfindən saxlanıldığı və hazırda dəmir barmaqlıqlar arxasında olduqları iddia edilir.
 
Məsələyə münasibət bildirən Tərlan Əhmədov məsələdən xəbərsiz olduğunu deyib. O, belə işlərdə heç vaxt iştirak etmədiyini dilə gətirib: “Dünən bütün günü toyda olmuşam. Mətbuatda yazılanlardan xəbərsizəm. Nizami ilə aramızda komandaya dəvətlə bağlı söhbət belə olub ki, bu ilin oyunları başa çatandan sonra danışaq. Amma kiməsə rüşvət təklifi, ümumiyyətlə, ağlımızdan keçməyib. Həyatım boyu belə işlərə getməmişəm. Əgər kiminsə faktı varsa, gətirsin, qabağımıza qoysun, görək nədir, nə deyil? Çünki nə məsələ olduğunu bilmirəm. Amma belə söhbətlərdə heç vaxt olmamışam. Həmişə də demişəm ki, nə olacaqsa, halallıqla olsun. Bir işin halallığı yoxdursa, mənə lazım deyil. Elə oyunlara getmərəm. Belə şeylərə baş qoşmaq istəmirəm. Onsuz da, bizdə elədir ki, nəsə olan kimi, mətbuat aləmi bir-birinə qatır. Nizami ilə anlaşma yox, danışıq olub. Anlaşma çempionat oyunlarından sonra baş tuta bilər”.
 
Əhmədov məsələnin sübutu üçün faktın vacib olduğunu vurğulayıb: “Heç vaxt hansısa futbolçuya oyunu zəif keçirməsi ilə bağlı təklif etməmişəm. Çünki elə şeylərdən xoşum gəlmir, Allahdan qorxuram. Digər tərəfdən “Neftçi”nin elə böyük büdcəsi də yoxdur ki, kiməsə pul təklif etsin. Kimin faktı varsa, gətirib ortaya qoysunlar, yalandan yazmasınlar. Əgər Nizami və ya başqa futbolçularla bağlı əllərində fakt yoxdusa, şər atmasınlar”.
 
RePost.Az

Baxış sayı: 3599 | Tarix: 30.11.2017
Bizi Telegramda izləyin: @repostaz