Dövlət təhlükəsizliyi üçün vacib addım: Şimalın istifadə edəcəyi radikallar vaxtında zərərsizləşdirilir - TƏHLİL

Ukrayna müharibəsi Rusiyanın resurslarını ciddi şəkildə zəiflətsə də, imperiya təfəkkürünü və postsovet məkanını nəzarətdə saxlamaq istəyini azaltmayıb. Bu baxımdan, müharibə başa çatdıqdan sonra Kremlin Qafqaz istiqamətində təsir dairəsini yenidən genişləndirməyə çalışacağı şübhə doğurmur. Regionun enerji-logistika mərkəzi olan Azərbaycan isə bu prosesdə əsas hədəflərdən biri ola bilər. Şimalın məqsədi Bakının müstəqil siyasi kursunu zəiflətmək, daxili sabitliyə təsir etmək və ölkəni yenidən öz orbitinə yaxınlaşdırmaq cəhdi ola bilər.

 

Ramiz Mehdiyev və onun təsir dairəsi

 

Bu kontekstdə Azərbaycan daxilində müəyyən siyasi qruplardan, xüsusilə də uzun illər müxtəlif xarici dairələrlə əlaqələrdə adı hallanan şəxslərdən istifadə cəhdləri mümkündür. Bu fiqurlardan biri də Prezident Administrasiyasının sabiq rəhbəri Ramiz Mehdiyev və onun təsir dairəsi hesab olunur.

 

Milli Məclisin deputatı Hikmət Babaoğlu deyir ki, Azərbaycanın milli təhlükəsizliyi baxımından bu mərhələdə əsas prioritet dövlətçiliyə zərər vuran və ölkəni yenidən xarici təsir altına qaytarmağa cəhd edən qüvvələrin qətiyyətlə zərərsizləşdirilməsidir.

 

Hikmət Babaoğlu: "Azərbaycan dünya siyasətinin gündəmini müəyyən edən ölkələrdən birinə çevirilməkdədir"

 

O, APA-ya açıqlamasında deyib ki, hazırda milli təhlükəsizliyin qorunmasının mühüm mərhələsinə qədəm qoymuşuq: "Azərbaycan dövlətçiliyinə və suverenliyinə qarşı addımlar atan şəxslərin iflası və ifşası mərhələsindəyik".

 

“Milyarderlər İttifaqı”-“Milli Şura"

 

Mehdiyevin uzun illər ərzində müxtəlif şəbəkələr qurması, habelə radikal mövqeləri ilə seçilən AXCP və “Milli Şura” üzərində təsir imkanlarını qoruması Kremlin informasiya və siyasi təsir strategiyası üçün əlverişli platforma yarada bilər.

 

Hələ 2013-cü ildə Azərbaycanda dövlət çevrilişinə cəhd planlarını xatırlamaq yerinə düşər. Həmin vaxt Rusiyada "Milyarderlər ittifaqı" quruldu, azərbaycanlı iş adamları bu ittifaqa cəlb edildi, onların Azərbaycanın siyasi müxalifəti ilə əlaqələri formalaşdırıldı. Bu prosesdən bir qədər əvvəl “Ziyalılar Forumu” yaradılsa da, az sonra orda toplaşan ziyalılardan bəziləri məsələnin mahiyyətini anladılar və uzaqlaşdılar.

 

Cəmil Həsənlinin formal, Əli Kərimlinin isə faktiki rəhbərlik etdiyi “Milli Şura” adlı rusiyapərəst birlik formalaşdı.

 

Prezident seçkilərindən sonra bu şuranın Rusiya prezidentinə məktubu da mediada yayıldı.

 

Bütün bu prosesdə Rüstəm İbrahimbəyov irəli verilib, “Milli Şura”nın vahid namizədi elan olunsa da, hamıya aydın idi ki, Şimalın namizədi Abbas Abbasov idi.

 

Bəzi məlumatlara görə, həmin vaxt məhz proses və maliyyə şimaldan idarə edildiyi üçün bəzi siyasətçilər “Milli Şura”ya qoşulmaqdan imtina etmişdilər.

 

"Yeni Azərbaycan" qəzetinin baş redaktoru Alqış Həsənoğlu mediaya müsahibəsində qeyd edib ki, 2019-cu ildə Əli Kərimli məhz Ramiz Mehdiyevin vəzifədən getməsini yubatmaq üçün onun tspşırığı ilə aksiya təşkil edib.

 

Ramiz Mehdiyev vəzifədən getdi, Əli Kərimli mitinq keçirmək həvəsi öldü

 

Maraqlı məqam ondan ibarətdir ki, Ramiz Mehdiyev vəzifəsindən azad olunduqdan sonra Əli Kərimli mitinq keçirmək həvəsinə düşmədi.

 

Bu isə onu göstərir ki, Mehdiyev Administrasiya rəhbəri olduğu dövrdə AXCP-nin davamlı mitinq tələbləri və meydan aktivliyindən məhz daxili siyasi proseslərin eskalasiyasında istifadə edirdi.

 

Deputat Hikmət Babaoğlu da hesab edir ki, Ramiz Mehdiyevin işi üzrə aparılan prosesdə məsələnin Azərbaycan radikal müxalifətinin təmsilçiləri ilə əlaqələndirilməsi tamamilə məntiqli görünür.

 

"2013-cü ildə Azərbaycanda “Milli Şura” ideyasının siyasi proseslərə bağlanmasına cəhd edilərkən qeyri-adi vəziyyət yarandı. Paradoksal şəkildə həmin “Milli Şura”ya və radikal müxalifət tərəfdarlarına Rusiyadan da müəyyən qüvvələrin qoşulduğu müşahidə olundu, bununla da onların siyasi proseslərə təsir imkanları xeyli artdı. İndi isə bəlli olur ki, Azərbaycanda dağıdıcı fəaliyyətlərin koordinasiyası, eləcə də siyasi proseslərin manipulyasiyası məhz Ramiz Mehdiyev tərəfindən həyata keçirilib. Bu isə hazırkı mərhələdə daha təhlükəli haldır. Ona görə də bu cür zərərli kombinasiyaların qarşısı mütləq alınmalıdır", deyə, deputat qeyd edib.

 

Ramiz Mehdiyev-AXCP işbirliyi

 

Ramiz Mehdiyev Prezident Administrasiyasının rəhbəri vəzifəsindən uzaqlaşdırıldıqdan sonra da bəzi müxalif dairələrlə, xüsusilə AXCP ilə gizli təmaslar qurduğu barədə silsilə məlumatlar var. Bu əlaqələr vasitəsilə “Dövlət Şurası” adlı paralel strukturun yaradılması, hakimiyyətin dəyişdirilməsi və xarici dəstəyin təmin edilməsi kimi planlar hazırlanıb.

 

Həmin planların məqsədi dövlət orqanlarına inamsızlıq yaratmaq, cəmiyyətdə çaşqınlıq formalaşdırmaq və sabitliyi sarsıtmaq olub. Bu istiqamətdə Mehdiyev şəbəkəsi ilə AXCP arasında ideoloji və informasiya əməkdaşlığı qurulduğu da bildirilir. Onun vəzifədən uzaqlaşdırılmasından sonra radikal mitinq çağırışlarının kəskin şəkildə səngiməsi isə bu əlaqələrin funksional xarakter daşıdığını təsdiqləyən əsas indikatorlardan biridir. Bu, həm də müəyyən qüvvələrin sistemli şəkildə daxili sabitliyə təzyiq yaratmağa çalışdığını göstərir.

 

Belə bir şəraitdə AXCP kimi radikal davranışları ilə seçilən, dövlət maraqlarına zidd mövqelər sərgiləyən siyasi qrupların vaxtında zərərsizləşdirilməsi, onların xarici dairələrin təsir alətinə çevrilməsinin qarşısının alınması milli təhlükəsizliyin əsas istiqamətlərindən biri olmalıdır. Azərbaycan dövlətinin möhkəm institusional dayaqları, preventiv təhlükəsizlik strategiyası və ictimai-siyasi sabitliyi qorumaq bacarığı şimal dairələrinin mümkün planlarının reallaşmasının qarşısında əsas maneə olaraq qalacaq.

 

Bəzi rayonlarımızda Rusiya bayrağının qaldırılması, SSRİ bayraqlarının nümayiş etdirilməsi kimi siyasi mesajlar təsadüfi deyil.

Belə bir şəraitdə hakimiyyəti uzurpasiya etməyə çalışanlara qarşı qətiyyətli konstitusion mübarizə aparılmalıdır. AXCP, “Milli Şura” və bu siyasi teatra dəstək verən Ramiz Mehdiyev tam ifşa olunmalıdır. Azərbaycan təhlükəsizlik

orqanlarının bu prosesi vaxtında aşkar etməsi təqdirəlayiqdir.

 

Əli Kərimli, “Milli Şura” və Cəmil Həsənli siyasi səhnədən silinməlidir

 

Hikmət Babaoğlu hesab edib ki, Azərbaycan siyasi sistemində uzun illər dağıdıcı rol oynamış, müxtəlif xarici dairələrin diktə etdiyi imperiya və islamofob maraqları milli maraqlardan üstün tutan AXCP sədri Əli Kərimli, onun funksionerləri, eləcə də “Milli Şura” üzvləri, o cümlədən Cəmil Həsənli hazırkı mərhələdə siyasi sistemdən birdəfəlik uzaqlaşdırılmalıdır.